مشــــوار

فى شوارع كتيرة .. تايهين فى المسيرة

بنهتف ننادي .. تعيشي يا بلادي

فتاوي و حكاوي .. قصص على القهاوي

قلوبنا حزينه .. عليكي يا مدينة

اموت أو اعيش .. خلاص مايهمنيش

هاتكونوا يا ولادي .. احرار فى بلادي

قلتوا عيال .. و سألتوا سؤال

نزولنا ده ليه .. و هايفيد بأيه

و ديني و أذانك .. نزولنا عشانك

عشان قلب واحد .. لوطننا نجاهد

عشان خوف يسيبك .. و ذعر ما يصيبك

عشان عزة و كرامة .. عشان ما تشوف غمامه

عشان حكم عسكر .. داير فينا بيقتل

يخرب , يفرق .. عشان وطننا يفرق

رافضين حكم عسكر .. لحد كده و يشكر

عشان مايكل نبيل .. و غيره ناس كتير

طالبوا برأي حر .. حرية فى التفكير

عشان يسود قرارك .. حكومتك من اختيارك

عشان تكون أمير .. ماتخافش من غفير

عشان تكون سياسي .. رأيك يكون اساسي

عشان كفايه بعبع .. سيبناه فينا يبعبع

بالمسايسة يندد .. و بقواضي يهدد

يا شعب انت حر .. ليه تعيش فى مر

صوتك قادر بيدوي .. و الظلم داير بيكوي

ثورتنا دي هاتكمل .. و مصر هاتبقى أجمل

لو عايز استقرار .. قول لا للدمار

لو عايز التغيير .. كون حر زي الطير

خلي صوتك يسمع .. و سيب عينك تدمع

بلاش تخلق فرعون .. قول لا لحكم الدون

افتح بيبان حرية .. و أمشي بخطاوي قوية

ما تقبل بنص ثورة .. الحكاية مش مقاولة

كمل مشوار جهادك .. وأصرخ و زيد فى عنادك

بقلم : أمنية الأبياري

فـــي سبــيـل حبـــهــا

قلبي واجعني على البلد و اللى راح من الولد

عايزة اقول كلمة و اسمعوها مني حكمة

بلدي و بلدكم كلكم لجاتلكم

بتوصي كل ولادها عليها يمكن تحنن قلبكم

صرخت بلدنا و قالت كفاية كده

حرقت قلوبنا عليها و مين يرضي بده

أطردوا منها الكلاب و أبعدوا عنها العدي

أتجمعوا على حبها شباب كتير من أرضها

ضحوا فى سبيل حبها .. دي الكرامة هى غايتنا و لازم نوصلها

خرجنا فى يوم الثورة الكبيرة و قلنا وراكى و فداكي يا مصر

مشينا و طوفنا شوارع كتيرة و اتضربنا ضرب مالهوش حصر

و قالوا علينا شوية عيال و عاملين هيصة و اديناهم مجال

و لما حسوا بكترة عددنا خافوا و كشوا و قلتوا فى ولادنا

و فتحوا السجون و ساد الجنون و نشروا الفساد و حرقوا البلاد

لكن شعب مصر الشعب الاصيل حماها بجد و أدي الدليل

صغير كبير وقف يحمي بلده .. و لا البرد حتي قدر عليه يهده

وقف طفل يحمي و يحرس فى بلده

شايل جوا قلبه عظمته و مجده

و ماسك فى ايده عصايه و شومة

و لو خدت رأى ده مش بس عيل صغير و تافه

ده راجل و عارف يحفظ كرامته

و فى جمعة غضبنا كتير اتضربنا و سالت دموعنا و اه .. اتوجعنا

و شوفنا بيعوننا مرارة عيشتنا و و أصواتنا راحت من كتر الهتاف

لكن بردو قلنا من فوق الكتاف

قلنا و عيدنا و زيدنا كتير

و بردو ما نابنا كزيادة لعذابنا

غير بس هو العزل الكبير

العزل الكبير كان تصرف حكومة غبيه و بارده

العزل الكبير لما حد قرر يحجم بلدنا

العزل الكبير لما قطعوا اتصالنا بكل جيراننا

و تحاول تكلم تطمن عيالك

و تحاول توصل ايه اللى جرالك

و تحاول تعبر تقول رأيك انت

تحاول توصل صوت استغاثتك

لكن تلاقى نفسك بطولك .. لوحدك

و شالوا وزارة و حطوا وزارة .. تعبتوا ليه روحكم تعبكم خسارة

فاكريننا ايه .. شعب برياله

صحيح شعب طيب و فرعه اصيل

لكنه له خبرة جيل بعد جيل

و فضلنا فى شوارعك بنهتف يا مصر

نطالب حكومة غبية بحاجه و هى بتروح و تنفذ فى حاجه

راحوا و دفعوا لنوعين من البشر

نوع بلطجي على قلبه حجر

و نوع تاني يجرح فى كلمتنا ليه

بيكتب كلام يجرحنا بيه

طب و دم سالى و كريم و أسلام و غيرهم كتير دول راحوا و السلام

قبضوا الفلوس عشان يروحوا يموتوا

لا دول ضحوا عشان يسود السلام

ضحوا بروحهم و ماتوا فدانا .. عشان ابني و ابنك ما يدوقوا المهانة

و شيلنا مبارك و بعده شفيق

لكن رجعنا تانى و و اتحطينا فى ضيق

نزل الحصان و الجمل الميدان

و اللى كان راكبه كان مهان و جبان

بيضرب فى اهله و دمه و وطنه

خان مبادئه و نزل من كرامته

و يا عيني عليك يا جيشنا

يومها قلت لا

لا مش هاتدخل و مية ألف لا

و بعدها رحت و اعتقلت فى ولادنا

فى يوم 9 مارس صوتنا اتجرح

فى يوم 9 مارس اخويا اتدبح

يوم 9 مارس كان بداية عذاب

يوم 9 مارس سفينا التراب

يوم 9 مارس اعتقلوا ولادنا

عذاب من جديد و ضرب و وعيد

اهانة كرامة .. قتل صوت حق عالي بيهتف

و متحفنا كان مقر الأنهيار

و فض لأعتصامنا بقوة و نار

و قدام سفارة صهاينة كلاب

اتضربنا تانى و سفينا التراب

و مات ناس جديدة .. و بنعيد فى القصيدة

و ناس بتهاجمنا  .. و تكذب فى كلامنا

عايزين استقرار  .. لو سكنا بجد هايسود الدمار

كل واحد فيكم افترى على بطل نزل بيهتف

و قال عليه عربجي و بلطجي و مزيف

كل واحد فيكم هايجيله يوم و يفهم

اننا متجمعين على الخير مسيحي و مسلم

اننا لسا بننزل عشان قضية كبيره

قضية فى حب مصر

و لازم كلنا نقولها

بحبك يا مصر

بحبك و هافضل اغير في بلدي
بحبك و صوتي هايعلى و يشدي
بحبك و هاوصل لكرامتي و مجدي
بحبك و هافضل اعاند و اجري
ورا حلمي فيكي ورا عظمتي و مجدي
بحبك و ناوي ارفع فى كرامتي
مصر يا ضحكة بين شفايف طفل شارد فى الشوارع
مصر  يا دمعة فى عيون ام حزينة على المطالع
مصر يا فرحة فى قلب بحر و مركب ورق
مصر يا غنوة حلوه بتهون الطرق
مصر بحبك و حبي ليكي فرق

كل اللى عايزاة مني صوتي يمنعك من الغرق

و هامنعك يا بلدي من الغرق

..

بقلم : أمنية الأبياري

 
هذة القصيدة مسجلة في الشهر العقاري بأسم الكاتبة أمنية الأبياري
و فى منظمة فكرة لحقوق الملكية الفكرية
و اى محاولة لنسخها او نشرها بدون ذكر أسم الكاتب سيعرضك للمسأله القانونية

طـربـوش أبـو الـهـول

برنامج جديد اسمه طربوش ابو الهول

فكرة برنامج طربوش ابو الهول فكرة بسيطة جدا

هاتدخل قلوبكم و انا عارفه

برنامج طربوش ابو الهول ببساطه و منغير تعقيد كتير

هو برنامج بسيط بيتكلم عن الشارع المصري و اللى بيجرا فيه

و عن رأى المصريين الحقيقي فى كل حاجه و فى اى حاجه

احنا مجموعة شباب قررنا نعمل حاجه تفيد كل الناس

و توصل صوت كل ولاد بلدنا لكل العالم بعد ما حسينا قد ايه

ان صوت المصري ضايع

و فى ناس كتير بتحاول تعتم عليه

و خاصة أعلامنا المصري نفسه

اللى المفروض يكون هو اللى بيكشف كل حاجه

طلع هو اللى بيغطي على صوتنا و شكوتنا

عشان كده قررنا نعمل البرنامج ده

برنامج طربوش ابو الهول

اللى بيتكلم عن كل و اى حاجه ممكن تتوقعوها

و بدون اى رقابه او مونتاج او حذف اى كلمة حتى لو كانت بسيطة

و الاستوديو بتاعنا عنوانه مايتوهش

الشــــارع المـــــصري

دور علينا هتلاقينا فى كل شارع و حارة

بنتكلم مع الناس

بنوصل شكوتهم و ضحكتهم

و لما لقينا ان النت من ضمن الوسائل اللى نقدر نوصل كل حاجه زي ما هى بدون اى رقابة على حريتنا و ارائنا

قررنا برنامجنا يكون على النت

نذيع على النت الحقايق عشان مش بس توصل فى مصر

لا و توصل فى كل العالم كمان

برنامجنا اول برنامج تلفزيونى على الفيس بوك

احنا مجموعة شباب مصري بسيط بينزل شوارع البلد

يلف فيها و يتكلم مع الناس و يحكي معاهم

يوصل دمعتهم و يوصل ضحكتهم

بنعرف مشاكلهم

و بنعرف ايه اللى بيحصل فيهم بجد

و بنعرف مواهبهم و بنضحك معاهم

هايكون معانا الفنانين و الناس اللى بتحب البلد دي بجد

و مش بيخافوا ينزلوا وسط ناسها فى الشارع

بيتكلموا معانا من الشارع بردو

هانقعد على القهاوي

و هانتكلم و نقول شعر و نغني و نمثل و نضحك و هانبكي

هاتيجي اوقات كتيرة هانبكي

عشان شوارع مصر مليانه حزن

بس بردو هانضحك

عشان كل المصريين دمهم خفيف

هايكون معانا فرق هاتقف و تغني فى وسط الشارع

و فنانين كوميديا هايعملوالنا عروض ستاند اب كوميدي بردو فى وسط الشارع

هانقوووول كل حاجه و مفيش علينا رقابة

و مش هنراعي اى مؤسسة اى كانت صفتها ايه

اللى بيحب الصراحه و عايز يعرف الحقايق يتابعنا

و اللى عايز يفضل مخدوع فى اوهام الاعلام المعتم على كل حاجه

و عايزة الرقابة و مش عايز تتقال نص كلمة على اى حد فى اى حاجه

يبقى بلاش تشوفلنا حاجه احسنلك

 ياريت تنضموا لينا

http://www.facebook.com/tarbosh.abo.elhool

.. أمنية الأبياري

tHe LaSt mSg

blood sprays the wall
it makes a dull thud
as his body falls
the phone hits the ground
the line goes dead
he left her a message
heres what he said
" hey baby whats up?
how have you been?
I was okay ...
then i saw you with him
you were reading a poem
i saw you lip the word love
my heaven became home
with hell up above
i thought we had something
too special to tell
like a bird with broken wings
i saw you and fell
but i guess i was wrong
in trusting you
though i did for so long
you broke it in two
so this is the end
of all that we had
this bulett will mend
these feelings of sad
A shot rings out

She walks to his grave
as the sun sets
she has a short letter
signed with her regrets
it says " sweetie i love you
how couldn't you see
that poem was yours
were having a baby
I didn't know what to say
so i got help from a friend
you came that way
and saw me reading it to him
if only you knew
that smile was yours
there was a girl with me there..
and that guy was hers..
honey i'm scared
i don't know what to do
this is something i wasn't prepared
to be put through
come back to me please
come back to me now
i cant live without you
i just don't know how
with tears in her eyes
she lays in the mud
she lays there and cries
wishing her tears were blood

 

 

 

يــــــارب

يا رب بحق ما شقيت لموسى
جوه البحر طريق
بحق ما رزقت مريم
ميه تبل الريق
بحق ما حفظت يونس
جوه في بطن الحوت
بحق ما نجدت إبراهيم
من اللهب و الموت
بحق يوسف الأمين
على تلال المال
بحق أيوب ما صبر
صبره يهز جبال
ترزقني ضي في سكتي
و كتابي باليمين
و تصلي على سيدنا النبي
إمام المرسلين
عليه الصلاة و السلام
آمين

يا صاحبتي .. كفايه غدر

ضحكت ضحكة وسط الحزن و الشكوي

ضحكت مش عارفه ليه

يمكن من همي بضحك

يمكن مش عايزة ابكي

يمكن بحاول انسي

و مفيش حاجه تنسي

حاسة انى طير محبوس 

صوتى ما يوصلش

حاسه انى ضحكة طفله

عايزة ماتكبرش

حاسة انى قلب حزين

مكسور و جواه جرح

لكن ويا السنين

بيحلم يلاقى الفرح

حاسه اني قلب شريد

عايش فى دنيا وحيد

ملان من التنهيد

بيناجي لحظه فرح
الحياة دي صاحبتي

مخصماكي يا صاحبتي

عشان زعلانه مني

كفايه عليا همومي 

و شكوتي و جنوني

ماعرفش لأيه هايوصلوني

مطرح ما هاوصل اوصل

مطرح ما هاترسي هانزل

و هاتوه ويا الشوارع

و هضحك مش عارفه ليه

..

مجنونة !!

اه .. مجنــــونــة

و ايه يعني مجنونة

بخاصم الحياة و هي تخاصمني

و عارفه المنتهي

هاترجع تصالحني

و بعدها بلحظات هاخد على دماغى

منها هى بردو

ما هى صاحبتي المجنونة

عارفاها حباني

لكن معندانى

عايزانى اتغير

و امشي بطوع امرها

لكنى مش زيها

انا ماشيه بدماغي

زعلانه مني يا صاحبتي

عارفه و مش عارفه

عارفانى انتى كويس

حفظانى .. صمانى

زيك كده عايزانى

مفيش مره مهاوداني

الفرق بيني و بينك

يا رفيقة احزانى

انى مابعرفش اغدر

بأصحابي و خلاني

لكن انتى غدارة و بتغدري بيا

و دماغى راكبه شمال و بردو حباكي 

بقول ممكن تتغيري

و اديني مستنيه

تعقلي .. تكبري

و تبقى مراعية

عارفه انى بضحك على روحي

و انك هاتطلعي روحي

و هاتفضلي تغدري 

و بيا تلعبي

لكن انا خسرانه ايه

هالعب بردو وياكي

و هى الدنيا دي ايه

غير انى اتوه فى هواكي

و الف بحور و ادور و ادور

و الف شوارع

و الأمل ضايع

و بردو برجعلك اضحك وياكي

فى عز الأه

بتوه فى دنياكي

بس انا النهارده

هافضل مخاصماكي

مع انى عارفه نفسي

بكرا هصالحك و اضحك معاكي
و هاقولك تانى و تانى

يا صاحبتي .. كفايه غدر
يا رفيقتي فى جناني

قلم : أمنية الأبياري

بـــــــــــــــــلادى

فى جسمى نار ورصاص وحديد .. علمك فى ايدى واسمى شهيد .. بودع الدنيا و شايفك يا مصر حلوه و لابسه جديد .. لأخر نفس فيا بنادى .. بموت و انا بحب بلادي

طايرين ملايكة حواليا طير ... لحظة فراقك يا حبيبتى غير
همشى معاهم وهسيبك ... و اشوف يا مصر وشك بخير
قالولى يلا ع الجنة ... قولتلهم الجنة بـــــــــــــــــلادى

كل ما نشوفها بنبكي
اتعرفوا فيهم
على اصحابكم و اخواتكم و قرايبكم
اتعرفوا فيهم
على كل حد فى حياتكم
...و على نفسكم كمان
شوفوا في عيون الشهداء
حاجات كتير تشبهكم

يارب .. قلوبنا بجد محروقة على الشهداء دول
يـــــــــــــــــــــارب

 

 

ا (اللي في التحرير دول عايزين إيه ؟ ) ا

• أولا ..  أنا أحترم كل من له رأي مخالف لي حتى من مازال يحب حسني مبارك
  ويظن أنه ظلم من الشعب فأنا سأحترمك كإنسان له الحرية في رأيك

• ثانيا .. من الطبيعي و الصحي الآن أن تشعر ببعض الحيرة لإنك يجب أن تتعب في التفكير ليس هناك روشتة يأتي أي إنسان يعطيها لك فتعلم أين الحق البين و أين الباطل البين
  من النهاردة لازم نفكر و يكون عندنا رأي بعد تفكير و تمحيص
  مش أي حد يقولك كلام في كافيه أو على الفيس بوك تصدقه إسمع كل الآراء
   إقرا و شوف و حلل كلنا ممكن نكون عدينا بلحظات بلبلة
  الوضع جديد علينا كلنا و إحنا مش راضعين سياسة

• ثالثا .. لك الحق أن تعترض مع أي رأي مهما كان و لك الحق أن تعترض معي
  و مع أي من أصحاب الرأي و غصب عن عين اي حد يجب أن يحترم إختلافك معاه
  في ناس كثير عندها رأي إننا ممكن نهدي الدنيا و كفاية كده
  و عايزين نرجع أشغالنا  وندي للناس فرصة نحكم عليها ..... إلخ
  وكمان ساعات بقوا  يشتموا في الثوار و مستعدين للتصادم معاهم
  لازم تتأكد إن الناس اللي في التحرير متأزمين من قعدتهم في الميدان
  و نومتهم هناك و تعطيل شغلهم أكثر منك بكثير
  منهم اللي نفسه يرجع شغله و يرجع ينام تحت البطانية و يخرج حتى مع صاحبته

المنطق ممكن يقول إن عودة الشرطة و الأمن و إستمرار الحياة الطبيعية
مالوش دخل تماما بالتحرير ده ميدان من آلاف الميادين في مصر مش معطل مصر


مشكلة الأمن و الشرطة هو كره رجل الشارع العادي
لأعمال العنف اللي عملتها الشرطة

و شافوها في الشارع و على الفضائيات و اليوتيوب
كل مصري عنده ثار
مع ظابط شرطة اعتقله أو ماجبلوش حقه أو إتنطط عليه في لجنة
و بسبب الوضع ده نفسه ياخد حقه

حل مشكلة الشرطة و الأمن من وجهة نظري مش إخلاء الميدان

حل مشكلة الشرطة بكل بساطة خطاب إعلامي من الشرطة

•  يجرم أي شرطي إنتهك القانون

• إعترافهم و تكريمهم بالثورة اللي العالم كله إعترف بيها

• و الأهم بكثير رفع مرتباتهم و تقليص عدد ساعات عملهم و معاملتهم معاملة كريمة من وزارتهم

و من الآخر

 لو فاكر إن الحل إخلاء الميدان
تبقى مش مدرك حجم المشكلة
و مستعدة أعلق رهان إن لو الميدان أخلى غدا ستجد أن المشكلة لم تحل
في رأي  بيقول إنه مش فاهم طلبات الثوار

هما ليه كارهين أحمد شفيق ؟
و هو إحنا شفنا منه حاجة وحشة ؟
الراجل له إنجازات في وزارته السابقة و لبق و يبدوا صادق

نفس الرأي بياخدوا على شباب التحرير
إنه مش فاهم إيه مطلبهم الحقيقي

و حاسس إن آرائهم منقسمة
و كل ما يتلبيلهم مطلب يطلبوا مطلب جديد
و إن ماعندهمش إحترام للرموز

لو ده رأيك و إنت إنسان حقاني إقرأ الكلام للآخر
و إسمع وجهة النظر المختلفة
اللي أعتقد إنها قريبة من معظم آراء المحتجين

 إحنا متفقين إن ما حدث هو ثورة شعبية لو بعد كل هذه الثورة
مش كل المطالب إتحققت و اللي حصل ''شوية إصلاحات'' تبقى مصيبة
 بعد كل الشهداء و المصايب

إنت زي اى واحد دفع مليون جنيه ماتخدش بيهم شوية جبنة و زتون
لازم تاخد حقك ثالث و مثلث


في التاريخ في ثلاث أنواع للثورات
ثورة إتخطفت زي إيران
ثورة إتعملت بعدها شوية إصلاحات بس الفساد كمل
و ثورة عملت دولة جديدة تماما و غسلت نفسها تماما من الفساد

كل واحدة من دول ليها ثمن

• الأولي هي اللي ناسها وقفوا بسرعة و روحوا ناموا

• الثانية إحتاجت شوية مجهود بس برضه الناس زهقت و روحت نامت بس متأخر شوية

• و الثالثة محتاجة مجهود كبير و شوية وقت و نفس طويل

عشان نروح للسيناريو الثالث
محتاجين الآتي  :-

• محتاجين لدستور جديد تماما

• محتاجين لإنتخابات قبلها خطاب إعلامي و وعي سياسي
  يتبني عند الناس قبل ما نقولهم روحوا إنتخبوا

• محتاجين ناس ينفذوا كل ده و لازم الناس دي تبقى لا تحسب على النظام
  اللي قامت عليه الثورة حتى لو كانوا أشرف من كانوا فيها المنطق
  بيقول إن اللي لازم يكون قائم على الإصلاحات و تلبية المطالب
  واحد من الداعين للثورة أو المؤمنين بيها
  أو على الأقل لم يعارضها أو يطالب بوقفها من قبل

.. و عشان أوضح
أنا بتكلم على اللي يشرف و يدير المرحلة مش اللي يحكم البلد
التاريخ بيقولنا إن أي ثائر أصبح حاكم تحول لدكتاتور و قامع لمعارضيه
حتى لو كان ديكتاتور عادل بس كان دكتاتور و لا يؤمن بالحريات

و الأمثلة كثيرة
من القذافي إلى كاستروا و الأمثلة كثيرة و مرطرطة
مافيش ثائر تحول لحاكم له معارضين

بالعكس بتبقى خبرته أكبر مع الثوار
و كيفية قمعهم لإنه كان منهم

إيه اللي هيحصل لو قبلنا بالاصلاحات ؟

هتحصل إنتخابات ممكن تكون نزيهة بس الدولة هتفضل دولة الرئيس
حتى لو هيمشي بعد مدتين هتلاقي النفاق طول حكمه ولاء المؤسسات
و أهمها الشرطة له مش للدولة و مش بعيد بسبب النفاق تلاقيه بيعدل الدستور عشان يكمل
و يشتغل الناس بالخوف من العدو الخارجي أو يستغل صمتهم أو يعمل نفسه ملاك
فالناس تحبه و توافق على تعديل الدستور و ده حصل ثلاث مرات
بأشكال مختلفة من الثلاثة اللي حكمونا

لإن ببساطة هتلاقي الكل بيقوله
'' يا ريس لو سبتنا هتحصل فوضى ''
و يبقى فاكر نفسه بيحمي البلد

اللى بيثقوا في الفريق أحمد شفيق و متمسكين بيه
لإنه الوحيد اللي يبدوا للشعب على إنه إنسان
( مدني )
و لكن له في الحقيقة خلفية عسكرية و أي حد كان عايش برا  أو سافر برا
أو ليه واحد صاحب أجنبي بالنسبة ليهم إنسان
'' يثير القلق "
أي إنسان في مصر ماكنتش المخابرات بتراقبه صبح و ليل طول عمره هو
  " مثير للقلق "
و دي العقلية الأمنية من سنة أربعة و خمسين و حكم عبد الناصر

هل من المتوقع أن تقوم المؤسسة العسكرية بدعم أحد المرشحين على حساب الآخر؟
هل ستمنع المعارضين له من الكلام في الإعلام؟
هل ستبدأ في التحكم أكثر في الإعلام ظنا منهم أنهم يمنعون البلبلة و الفوضى؟

أعتقد من السهل الإجابة الآن عن هذه الأسئلة
 و إن لم يكن صعب الآن لن يكون صعب قريبا
إيه اللي هيحصل لو الإنتخابات البرلمانية و الرئاسية حصلت قريبا ؟

الناس ممكن تقبل أكثر على صناديق الإقتراع مش هقول لأ .. و لكن بدون وعي سياسي
فا هيختاروا اللي شكله
 ''إبن حلال''
 أو اللي بيدفع أكثر .. و دي هتبقى مصيبة
 لإن ده معناه إكتساح اللي هيبيعوا بالدين و يركبوا دقن
 و إكتساح رجال الأعمال اللي عايزين يستفيدوا من السلطة زي اللي فاتوا

طب إيه الحل ؟

هو ده اللي بينادي بيه بقى اللي بتقولوا عليهم
'' العيال اللي قاعدة في التحرير "
بيطالبوا بـــــ

• حكومة تكنوقراط

طيب يعني إيه تكنـــوقــراط ؟

يعني ناس مش سياسيين بس بيشتغلوا في مجال وزارتهم 
وكلاء الوزراء مثلا أو من لهم خبرة و مش محسوبين على قوى سياسية الشعب ثار عليها

• بيطالبوا بــــمجلس رئاسي لحد ما يتعمل دستور مبني من الأول مجلس رئاسي من ناس مدنين يرضوا جميع الأطراف و معاهم عسكري

و ده مش إختراع شباب التحرير

ده حصل في تاريخ الثورات في دول ثانية
الثورات اللي نجحت في بناء بلاد جديدة ناصعة البياض
ينفع تبني عمارة فوق أنقاض العمارة اللي وقعت قبلها؟
بالمنطق كده لازم تشيل الأنقاض كلها
و تحفر كمان و تبدأ تحط أساسات و تبني من أول و جديد


الجميل إن حل المجلس الرئاسي ده و تأجيل الإنتخابات إلى وجود الوعي
و دستور جديد هيعمل أمان و هيرجع الإستقرار أسرع بكثير من الوضع القائم
 ليـــــه ؟

• أولا .. هتلاقي شباب التحرير سابوا التحرير و راحوا قعدوا في كافيهات

• ثانيا .. الناس هتحس بالأمان بعد إختفاء كل من كانوا رمز للفساد
  أو من تحالفوا مع الفساد أو كانوا بيقعدوا في نفس المؤسسات اللي كانت ماليانة فساد

لو ده محصلش
توقعوا المزيد من الإضطرابات
توقعوا الناس تكون دائما بتشك في نوايا كل الناس وكل المؤسسات
توقعوا عنف ضد المتظاهرين
توقعوا ظهور مطالب فئوية و إعتصامات بشكل أسرع
لإن الناس هتبدأ متلاقيش تاكل قريبا جدا
لو ده ماحصلش ممكن جدا تلاقي الإعلام الحكومي يتوجه عشان يخدم على مرشح
و يتربط إسمه بالإستقرار و يقمع من ينتقده أو يعارضه  أو – و ديه الأخطر – ينافسه
بسبب كل اللي بقوله ده
يجب أن تكون المطالب دي مطلب شعبي
لازم يبقى عندنا الوعي إن ديه المطالب اللي هتحمي الثورة و تبني مصر جديدة
لازم يلتف الشعب معاها زي ما إلتف مع الثورة و نجحها
و وجع يوم أحسن من وجع كل يوم
لكن الصمت الآن و مطالبة التهدئة هو مسكن للآلام
هيريحك شوية بس مش هيعالجك من أي مرض
ده كان كلام الأستاذ عمرو سلامة
اللى انا بتفق معاه فى كل كلمة قالها
لآننا فعلا محتاجين لناس تتكلم بالأسلوب ده
و تشرحها واحده واحده
لكل واحد مش فاهم حاجه اصلا
و بيتكلم بدون وعي و لا فهم منه
عن الموضوع لمجرد انه اتفرج على النشره
او سمع كلمتين طبعوا فى ودنه
و بقى بيسمعهم زي البغبغان
و فى النهاية كل واحد له رأيه .. زي ما هو قال فى البداية
اما بالنسبة بقى للمطالب بشكل واضح و صريح

...........

المطالب العاجلة لشباب الثورة

• إقالة حكومة الفريق أحمد شفيق وإعادة تشكيل حكومة تكنوقراط
  من غير الحزبيين يترأسها شخصية وطنية متوافق عليها في حد أقصاه شهر من الآن

• الإفراج عن كافة المعتقلين السياسيين قبل وبعد 25 يناير
  في مدي زمني أقصاه شهر من الآن، والنظر في العفو عن المسجونين السياسيين في غضون شهرين من الآن

• تقديم كل المسئولين الحقيقيين عن قتل الشهداء بإطلاق النار
  أو بإصدار الأوامر للمحاكمة العادلة بتهم واضحة  في أمر أقصاه شهر من الآن

في حالة موافقة المجلس علي مطالب الثورة المصرية
سننتقل الي التفاوض في بقية المطالب المتمثلة في التالي :-

• إعادة هيكلة وزارة الداخلية  بما يسمح بالإشراف القضائي الكامل عليها 
  والمراقبة الشعبية الحقيقية على أدائها  على أن يتولى رئاستها
  وزير مدني سياسي في غضون الستة أشهر المحددة للفترة الانتقالية

• حل جهاز مباحث أمن الدولة في مدي زمني شهرين من الآن
  وإلغاء توجيه المجندين لقطاع الأمن المركزي
  في غضون الستة أشهر المحددة للفترة الانتقالي.

• الإسراع في تشكيل مجلس رئاسي مدني يضم شخصية عسكرية
  في مدي زمني شهرين من الآن
  مع تحديد صلاحيات المجلس
   ويتولي بنفسه مع الحكومة الانتقالية الإشراف علي تحقيق المطالب الثورية
  وإجراء الانتخابات التشريعية والرئاسية

• تقديم موعد انتخابات المحليات في حد أقصاه الستة شهور المحددة للفترة الانتقالية
  وإعادة النظر في قانون الحكم المحلي

• ملاحقة بقايا النظام من الفاسدين  والمتربحين من دماء هذا الشعب
    وتقديمهم للمحاكمة العادلة  ومصادرة أموالهم وممتلكاتها

و انا بقولكم بقى
من ابسط بنت من بنات الثورة
بنت حاسه انها جنب ناس تانيه ماعملتش حاجه
 لكل الناس اللى بتقول ان ثورتنا نجحت
احنا لسا فى اول خطوة من نجاح الثورة
لسا ماعملناش حاجه
مفيش ثورة بتخلص فى يوم و ليلة
لسا زكريا عزمي بيحرق فى اوراق تدين النظام
لسا كتير من اصحاب الفساد فى البلد احرار
لسا عندنا حاجات كتير نعملها
لسا لازم نغير من نفسنا الأول
عشان كله يرجع لبيته و شغله
و نبدأ نبني مصر
أتمني تكونوا فهمتونا بقى
و تبطلوا تقولوا علينا عيال
احنا عايزين نأمن مستقبلنا و مستقبل اولادنا
عايزين ننهض بمصر و نعملنا مستقبل بقى
بطلو تقولوا علينا عيال و افهمونا الأول
و بلاش نمشي ورا اي حد بيحاول يستفيد من تعبنا لنفسه

أمـــنـــيــة الأبيــــاري ..

مذكرات ثورجية

انا بتكلم بصفتى بنت مصرية
كل ده انا شوفته بعيني و حضرته
روحنا هناك الميدان من يوم 25 لحد يوم 1 \ 2
و بيتنا هناك و عملنا كل حاجه نقدر عليها
هتفنا و اتضربنا و اتبهدلنا و فضلنا عند كلمتنا
شوفنا الناس بتموت قدامنا و بيكنا
رجالة و بنات و الله بكينا
رفضنا اى حد جه علشان يطلع على كتاف تعبنا و يظهر و يبان
و يقول انا معاكم و فضلنا عند كلمتنا
لحد يوم بيان الريس
لما البيان اتذاع
كل الشباب المثقف المتحضر قال طيب كويس
و مشينا على الناس نلف عليهم و نقولهم بلاش تنزلوا حاجه بكرا
لحد ما نشوف ايه اللى هايجرا
و بعد البيان بعشر دقايق تقريبا
طلع علينا البلطجية مانعرفش جم منين بيهتفا لمبارك
و انا ماعرفش دول فعلا حزب وطني مع مبارك و لا اجانب و لا حزب الله و لا ايه دول بالظبط
و على ايه ملة بالظبط
كل اللى اعرفة ان كان بيننا و بينهم خطوة او اتنين
و هما بيمسكوا الاقرب ليهم بيدبحوه بسيوفهم
دبحوا اكتر من 25 شاب و بنتين
و الدم جه علينا و الله و كان ممكن انا او اى حد من اللى واقفين جنبي يتدبحوا هما كمان
الجيش ماعملش حاجه
و البلطجية دول خطفوا بنتين تانيين
و مشيوا و هما بيهتفوا لمبارك
و ماحدش اتعرضلهم
و بيتنا فى الميدان اليوم ده كمان
و اول ما صبح علينا الأربعاء مشينا و احنا نكاد لا نصدق اللى شفناه
مجهدين و مصدومين
عندنا انهيار من مناظر القتل اللى شفناها
كل واحد فينا منتظر تفسير عن اللى حصل
حق اللى ماتوا دول
رجوع البنتين اللى اتخطفوا
بس ماحدش جاب سيرتهم
و لا كأن الموضوع حصل
و لا كأن حد اتقتل
و لا كأن فى بنات مفقودة مش عارفين مين اخدهم و عمل بيهم ايه
و بعد ده نلاقي الميدان اتفتح على مؤيد و معارض الاتنين فيه
بيضربوا فى بعض و ماحدش بيمنعهم
مـــــــــاشي
انما لما توصلنا أخبار بتقول ان جماعات من ايران و حزب الله
متجهة للميدان ناوين يولعوا فيه
و مصادر موثوق فيها مليون فى المية
و بعدها بشويه فعلا نلاقي فى ضرب نار حي على المتظاهرين

مـــــــــــؤيـــــــــد و مـــــــــــــــــعـــــــارض

طيب دول لو من عند مبارك هايبقوا بيضربوا المؤيديين ازاى
طيب دول لو مش من عند مبارك امال اللى جم بعد بيانه دول لو مش من عنده يبقوا من عند مين
طيب فى ناس بتقول ان الناس اللى بتضرب معاهم كارنيهات رجال شرطه
و فى ناس تانيه بتقول ان اللى بيضربوا دول بيتكلموا لغات مش فاهمينها
و منهم بيتكلم عبري
و فى ناس بتقول اتقبض على يهود من اللى بيضربوا

احنا مال اهالينا بالناس اللى بتقول
حــــــــــــــــــرام الناس اللى ماتت امبارح قدام عيني و عين البشر كلهم منغير ديه
حــــــــــــــــــرام البنات اللى اتاخدت و مش عارفين هما اتاخدوا فين
حـــــــــــــــــــــرام الناس اللى بتموت دلوقتى و ماليش دعوة سواء مؤيد او معارض بردو حــــــــــرام
حـــــــــــــــــــــــــــــــــرام ان اللى بيموتهم سواء كان مصري او ايراني او اسرائيلي انه يعدي منغير عقاب
حــــــــــــــــــــــــــــــرام ان اللى بيقتل الناس دي و قتلهم يوم الثلاثاء الفجر قدام عيوننا حتي لو كان يهودي يقدر يهرب
حــــــــــــــــــــــرام على كل اللى سايبين الناس بتموت و مركزين مين بيهتف نعم لمبارك و لا لمبارك
حــــــــــــــــــــــــــــــــــــــــــــــــــــــــــــرام عليكم البلد بقى
احنا اتضربنا و تعبنا و هتفنا و مات مننا كتير
بلاش بقى تسيبوا يموت اكتر
لو التواجد فى ميدان التحرير ده هو اللى هايوقف موت الناس خليكم يا شباب ربنا معاكم
و انا هانضملكم تانى زي ما كنت معاكم ببات فى الشارع طول الأسبوع اللى فات

كــــــــــــــــــــــــفـــــــــــايــــــــــــــــــــــــة

اللي في التحرير دلوقتي دول زينة شباب مصر
اللي في التحرير دول بجهلكو مش هيبقي لهم دية
و المصادمات لسة شغالة لحد دلوقتي
اللي في التحرير دول هما امل بكرة
هما الشباب اللي هيوقفوا مصر علي رجلها تاني 
اللي في التحرير دول بجهلكو هتضيعوا حياتهم و حقهم و حقنا معاهم
اللي في التحرير دول مش هيتعوضوا تاني
ارجوكم متضيعوش شباب مصر و افهموا اللي بيحصل
الحقوا مصر قبل ما تضيع
و الله الحق دايما صوته أعلى
و بطلوا فرجة على التلفزيون و القنوات العميلة اللى بتزيف الحقيقة

 .. أمنية الأبياري